नाशकात अम्ब्रेला पेंटींग कार्यशाळा

 नाशकात अम्ब्रेला पेंटींग कार्यशाळा

नाशिक : यशवंतराव चव्हाण प्रतिष्ठान मुंबई, विभागीय केंद्र नाशिक व विश्वास को-ऑप.बँक लि., नाशिक, अबीर क्रिएशन्स, विश्वास ज्ञानप्रबोधिनी अ‍ॅण्ड रिसर्च इन्स्टिट्यूट, नाशिक, सारस्वत बँक, रेडिओ विश्वास 90.8 कम्युनिटी रेडिओ व विश्वास लॉन्स यांच्या संयुक्त विद्यमाने ख्यातनाम सुलेखनकार अच्युत पालव यांच्या अम्ब्रेला पेंटींग कार्यशाळेचे नाशकात आयोजन करण्यात आले आहे.
     रविवार दि. २ जुलै २०१७ रोजी सकाळी ९ ते दुपारी १२ या वेळात क्लब हाऊस (विश्वास लॉन्स), ठाकूर रेसिडेन्सी, विश्वास को-ऑप. बँकेसमोर, सावरकरनगर, गंगापूररोड, नाशिक येथे सदर कार्यशाळा  होणार आहे.
     पावसाच्या अनेक रूपांचा शब्दांतून, अक्षरलेखनातून होणारा अविष्कार या कार्यशाळेत अनुभवास मिळणार आहे. ‘अम्ब्रेला पेंटींग’ हा नवा अक्षर सौंदर्याचा प्रकार अच्युत पालव यांनी विकसित केला आहे. कार्यशाळेत सहभागी होणार्‍या शिबिरार्थींकडून ‘अम्ब्रेला पेंटींग’ करून घेतले जाणार आहे. रंगरेषांचे सहज आणि सोप्या पद्धतीतून मार्गदर्शन सदर कार्यशाळेत अच्युत पालव करणार आहेत. गेली अनेक वर्षे महाराष्ट्रातील नव्हे तर भारतातील दुर्गम भागात जाऊन कॅलिग्राफीचा प्रसार  पालव करीत आहेत. कार्यशाळेसाठी लागणारे साहित्यही देण्यात येणार आहे. अधिक माहिती व नोंदणीसाठी चिंतामण पगार, मो. ९३७१६६१५०९, निलेश गायधनी, मो.९८८१४७२७७३, केतकी गायधनी, मो.७७६९९२२७७३ यांच्याशी संपर्क साधावा.
     तरी या कार्यशाळेस जास्तीत जास्त संख्येने सहभागी होण्याचे आवाहन कार्याध्यक्ष विश्वास ठाकूर, सचिव डॉ.कैलास कमोद, कोषाध्यक्ष डॉ.सुधीर संकलेचा, सदस्य सौ.कविता कर्डक, राजवर्धन कदमबांडे, रऊफ पटेल, अ‍ॅड.नितीन ठाकरे व विक्रम मोरे यांनी केले आहे.

कृषी दिनानिमित्त शेतकरी मेळावा व चर्चासत्राचे आयोजन

कृषी दिनानिमित्त शेतकरी मेळावा व चर्चासत्राचे आयोजन 

अहमदनगर : यशवंतराव चव्हाण प्रतिष्ठान मुंबई, विभागीय केंद्र अहमदनगर, यशवंत सामाजिक प्रतिष्ठान सोनई, मुळा एज्युकेशन सोसायटीचे कृषी महाविद्यालय सोनई, यांच्या संयुक्त विद्यमाने श्री. यशवंतराव गडाख पाटील यांच्या मार्गदर्शनाखाली व मा. प्रशांतभाऊ गडाख पाटील यांच्या कल्पक नियोजनाखाली शनिवार दि. १ जुलै २०१७ रोजी सकाळी ९ वाजता कृषी दिनानिमित्त शेतकरी मेळावा व चर्चासत्राचे आयोजन करण्यात आलेले आहे. कार्यक्रमाला प्रमुख पाहुणे म्हणून डॉ. मुकूंदराव गायकवाड कुलपती, अरविंद कृषी विद्यापीठ, नागपूर आणि कार्यक्रमाचे अध्यक्ष मा. श्री. ज्ञानेश्वर पवार कृषीभूषण, पुनतगाव. ता. नेवासा हे असतील. डॉ. विनायक देशमुख सहसचिव, मुळा एज्युकेशन सोसायटी, उत्तमराव लोंढे सचिव, मुळा एज्युकेशन सोसायटी श्री. शंकरराव पटारे जनरल मॅनेजर, मुं. स.सा. कारखाना सोनई यांची प्रमुख उपस्थिती असेल. हा कार्यक्रम कृषी महाविद्यालय सोनई येथे होईल. 

विज्ञानगंगाचे सतरावे पुष्प...

विज्ञानगंगाचे सतरावे पुष्प...
चिरतारुण्याची किल्ली सापडली!

माणसाच्या चिरतारुण्याचे रहस्य काय? आजच्या धकाधकीच्या जीवनशैलीत या विषयावर सल्ले देणारे अनेक गुरू भेटतील. परंतु केवळ माणसाच्याच नव्हे, तर समस्त प्राणीसृष्टीच्या शरीरातील चिरतारुण्याला चैतन्य देण्याची क्षमता नेमकी कुठे दडली आहे, त्याचे रहस्य भेदण्याचे काम टाटा मूलभूत संशोधन केंद्रातील संशोधकांनी केले आहे. सर्व सजीवांमध्ये आढळणाऱ्या चिरतारुण्याच्या जनुकास सक्रिय करण्याची क्षमता निश्चितपणे कोणत्या क्षेत्रात आहे, त्याचे केंद्र शोधून काढण्याचे काम टीआयएफआरमधील शास्त्रज्ञ डॉ. उल्लास कोलथुर यांनी केले आहे. याविषयी अधिक माहिती व आपल्याशी संवाद साधण्यासाठी यशवंतराव चव्हाण प्रतिष्ठान, मुंबई व मराठी विज्ञान परिषद यांच्या संयुक्त विद्यमाने 'विज्ञानगंगा' कार्यक्रमांतर्गत सतरावे पुष्प 'चिरतारुण्य' या विषयावरील व्याख्यान २१ जुलै २०१७ रोजी सायंकाळी ५ वाजता  चव्हाण सेंटर, सांस्कृतिक सभागृह, चौथा मजला, जनरल भोसले मार्ग, मुंबई येथे गुंफणार आहेत. तरी वरील कार्यक्रमास आपण उपस्थित रहावे ही विनंती. 

चित्रपट चावडीतर्फे 'लेथ जोशी' मराठी चित्रपट

चित्रपट चावडीतर्फे 'लेथ जोशी' मराठी चित्रपट 

औरंगाबाद : यशवंतराव चव्हाण प्रतिष्ठान मुंबई, विभागीय केंद्र औरंगाबाद, एमजीएम पत्रकारिता महाविद्यालय व आयटक कामगार युनियन यांच्या संयुक्त विद्यमाने चित्रपट चावडीतर्फे 'लेथ जोशी' मराठी चित्रपट शनिवार दि. ८ जुलै २०१७ रोजी सायंकाळी ५:३० वा रुक्मिणी सभागृह,एमजीएम परिसर,औरंगाबाद येथे दाखवण्यात येणार आहे. याप्रसंगी चित्रपटाचे दिग्दर्शक मंगेश जोशी उपस्थित राहून रसिकांसोबत संवाद साधणार आहेत.

चित्रपटाबाबत अधिक माहिती...

पुणे आंतरराष्ट्रीय चित्रपट महोत्सवातील संत तुकाराम सर्वोत्कृष्ट आंतरराष्ट्रीय मराठी चित्रपट. बंगळुरू आंतरराष्ट्रीय चित्रपट महोत्सवातील स्पेशल ज्युरी अ‍ॅवॉर्डचा मानकरी. जागतिक पातळीवरील दहा आंतरराष्ट्रीय चित्रपट महोत्सवात निवड झालेला - *‘लेथ जोशी’*

ही यांत्रिकीकरणामध्ये अस्ताला जाणाऱ्या तंत्राची, हरणाऱ्या श्रमिकाची आणि त्याच्या कौशल्याची गोष्ट आहे. पूर्वी कारखान्यामध्ये काम करताना कामगाराच्या कौशल्याची जागा आधुनिक लेथ यंत्राने घेतली. या आधुनिकीकरणामुळे त्या कामगाराची कौशल्य साधने आणि त्यापाशी जपलेल्या भावनाच काळाच्या पडद्याआड जातात हा विषय मंगेश जोशी या युवा लेखक-दिग्दर्शकाने ‘लेथ जोशी’मधून मांडला आहे. चित्तरंजन गिरी, अश्विनी गिरी, सेवा चौहान आणि ओम भूतकर यांच्या प्रमुख भूमिका आहेत. मंगेश जोशी यांच्या पत्नी सोनाली जोशी निर्मात्या असून, संगीतकार नरेंद्र भिडे आणि नितीन वैद्य हे सहायक निर्माते आहेत. सारंग कुलकर्णी यांनी संगीत दिले आहे.

आपला समाज कशा पद्धतीने बदलत गेला त्यावर हा चित्रपट भाष्य करतो.जागतिक,आर्थिक, कौटुंबिक मूल्य आणि मानवी संबंध यांच्यातील संघर्षांबरोबरच मानसिक स्थिती याविषयीचे चित्रण असलेला हा चित्रपट म्हणजे साध्या पद्धतीने सांगितलेली गुंतागुंतीची गोष्ट आहे.

आपणा सर्वांना सादर निमंत्रण...

वसंत पळशीकरांच्या विचारांची (Documentary )

वसंत पळशीकरांच्या विचारांची (Documentary )

दिग्दर्शक समीर शिपूरकर यांनी वसंत पळशीकरांचे सामाजिक, राजकीय, विज्ञान, अशा विविध विषयांवर कशा प्रकारे मोठे लेख लिहिले, तसेच पळशीकरांची विश्लेषण करण्याची पध्दत, त्यांनी समस्येवर दिलेलं उत्तर अशा विविध घटकांची माहिती देणारी (Documentary) दिग्दर्शक समीर शिपूरकर यांनी उत्तमरीत्या तयार केली आहे. (Documentary) ही १ तास ३० मिनिटांची असून यातून बरचं काही शिकता येईल असं शिरपूरकर यांनी सांगितलं.

यशवंतराव चव्हाण प्रतिष्ठान,मुंबईच्या ठाणे विभागातर्फे..
'मुशायरा' मराठी व हिंदी तसेच उर्दू गझल गायन कार्यक्रम संपन्न...

यशवंतराव चव्हाण प्रतिष्ठान, मुंबईच्या ठाणे केंद्राचा 'मुशायरा' या मराठी, हिंदी तसेच उर्दू गझल गायन कार्यक्रम मराठी ग्रंथ संग्रहालय, तिसरा मजला, गोखले रोड, ठाणे येथे रविवार दि. ११ जून २०१७ रोजी संपन्न झाला.
कार्यक्रमाचे सुरुवातीला संस्थेचे अध्यक्ष श्री. मुरलीधर नाले, उपाध्यक्ष डॉ. महेश केळुस्कर तसेच खजिनदार श्री. जवकर यांनी आणि निमंत्रितांच्या साक्षीने स्व. यशवंतराव चव्हाण साहेब यांच्या प्रतिमेस पुष्पहार अर्पण केला. त्यानंतर संस्थेचे सचिव श्री. अमोल नाले यांनी संस्थेची ध्येयधोरणे सांगून 'मुशायरा' या कार्यक्रमासाठी निमंत्रित करण्यात आलेल्या मान्यवरांविषयीची थोडक्यात माहिती उपस्थितांना दिली. या सर्व मान्यवरांचा संस्थेच्या कार्यकारीणीकडून अध्यक्षांच्या हस्ते शाल तसेच पुस्तक भेट देऊन सत्कार करण्यात आला.
सदर कार्यक्रमाचे सुत्रसंचालन नितीन आरेकर यांनी केले. ख्यातनाम उर्दू गझलकार श्री इरफान जाफरी यांच्या उर्दू गझलांनी कार्यक्रमाची सुरुवात करण्यात आली. या प्रसंगी हिंदी गझलकार श्रीमती सुलभा कोरे तसेच श्री लक्ष्मण शर्मा यांनी आपल्या गझलांनी उपस्थितांची मने जिंकून घेतली. सदर कार्यक्रमास मराठी गझल सादर करण्यासाठी श्री. डॉ. महेश केळुस्कर, श्री. प्रशांत मोरे, श्री. शशीकांत तिरोडकर तसेच प्रा. श्रीमती प्रतिभा सराफ अश्या मान्यवरांना निमंत्रित करण्यात आले होते. कार्यक्रमाच्या शेवटी संस्थेचे सचिव श्री. अमोल नाले यानी संस्थेच्या वतीने मान्यवरांचे तसेच उपस्थितांचे आभार मानले. 

अपंग हक्क विकास मंच तर्फे
दिशा सबलीकरणाची कार्यक्रम संपन्न...

यशवंतराव चव्हाण प्रतिष्ठान मुंबई, अपंग हक्क विकास मंच, सहयोगी पालक संस्था नवी मुंबई आणि हेलन केलर इस्टीट्यूट डेफ फॉर अण्ड डेफ यांच्या संयुक्त विद्यमाने "दिशा सबलीकरणाची" या कार्यक्रमाचे चव्हाण सेंटर मध्ये आयोजन करण्यात आले होते. कार्यक्रमाला समीर घोष, सुधित पारेख, योगेश देसाई, प्रकाश बाळ आणि मीनल मंडलिक यांची प्रमुख उपस्थिती होती.

 इतनी शक्ति हमें देन दाता या सामूहिक गिताने सुरुवात करण्यात आली. त्यानंतर विजय कानेकर यांनी दिशा सबलिकरणाची ह्या कार्यक्रमाचे स्वरुप समजावून सांगितले, तसेच दिवसभरात होणाऱ्या कार्यक्रमाची माहिती दिली. त्यानंतर समीर घोष यांनी पाल्याला येत असलेल्या अडचणी उपस्थिताना संगीतल्या आणि घरातून पाल्याचा आदर करा म्हणजे त्याच्या सकारात्मक बदल होईल असा सल्ला त्यांनी पालकाना दिला.

मागील ३० वर्षापासून मी हे अनुभव घेत असून आम्ही त्याला चांगल्या वाईट गोष्टी समजावून सांगितल्या आहेत. तसेच आम्ही त्याला देशाबाहेर आणि देशात कुठेही घेऊन फिरतो अशी माहिती ज्येष्ठ पत्रकार प्रकाश बाळ यांनी सांगितली. कार्यक्रमाला आलेल्या विविध संस्थांच्या काही व्यक्तिनी आलेले अनुभव सांगितले. दुपारच्या सत्रानंतर मुलांकडून वर्कशॉप करुण घेतले. 

'आत्ममग्नता'जाणीव जागृती कार्यशाळा संपन्न...
दिव्यांग मुलांचा अतुलनीय कामगिरीबद्दल सन्मानचिन्ह देऊन सत्कार..

सामाजिक न्याय व विशेष सहाय्य विभाग आणि महाराष्ट्र प्राथमिक शिक्षण परिषद, महाराष्ट्र शासन मुंबई, यशवंतराव चव्हाण विकास प्रबोधिनी (यशदा) पुणे, अपंग वित्त विकास महामंडळ महाराष्ट्र राज्य मुंबई, फोरम फॉर ऑटिझम मुंबई पालक संस्थांचा राष्ट्रिय महासंघ, यशवंतराव चव्हाण प्रतिष्ठान मुंबई आणि अपंग विकास हक्क विकास यांच्या संयुक्त विद्यमाने 'आत्ममग्नता' जाणीव जागृती कार्यशाळेचे आयोजन करण्यात आले होते. विशेष म्हणजे आजच्या कार्यक्रमात विविध क्षेत्रात दिव्यांग मुलांनी अतुलनीय कामगिरी केली आहे, अशा विद्यार्थ्यांचा प्रमाणपत्र आणि सन्मानचिन्ह देऊन सत्कार करण्यात आला.
आजच्या कार्यक्रमाला मा. मंत्री राजकुमारजी बडोले (मंत्री सामाजीक न्याय व विशेष सहाय्य) करणार असून मा.ना. दिलीप कांबळे (राज्यमंत्री सामाजिक न्याय), मा. खा. सुप्रिया सुळे, मा. नंदकुमार (शिक्षण सचिव) मा. दिनेश वाघमारे (सचिव सामाजिक न्याय), मा. नितीन पाटील (आयुक्त, अपंग कल्याण) आदी मान्यवरांची उपस्थिती होती. सुरुवातीला डॉ. समीर दलवाई यांनी आत्ममग्नता या विषयावर उपस्थितांना मार्गदर्शन केले. त्यामध्ये मुलांच्या वर्तणुकीतील झालेल्या बदलांना कसे ओळखावे याबद्दल महत्त्वाची माहिती सांगितली. त्यानंतर प्रतिष्ठानच्या कार्यध्यक्षा सुप्रिया सुळे यांनी सुध्दा सर्वाना 'आत्ममग्नता' याबद्दल माहिती दिली. तसेच विविध सामाजिक संस्थामध्ये काम करत असताना आलेले अनुभव सांगितले.
कार्यक्रमामध्ये पुरस्कार देण्यात आलेल्या खेळाडूंचे स्वागत करुन त्यांच्या पालकांचे राज्यमंत्री दिलीप कांबळे यांनी अभिनंदन केले. या मुलांसाठी धोरणात्मक जे काही असेल ते शासनाच्या वतीने चालू करण्यात येईल असे आश्वासन  त्यांनी दिले. आम्ही सर्व अधिकारी पदाधिकारी आपल्या सोबत आहे, आतपर्यंत आम्ही अनेक काम केली आहेत. दिव्यांग बांधवांना  सामाजिक न्याय विभागातर्फे १२३ शाळांना मदत केली आहे. आम्ही विविध घटकावर सध्या काम करत आहोत त्याचा फायदा भविष्यात होईल असे मा. मंत्री राजकुमार बडोले यांनी कार्यक्रमात सांगितले.

बारावीनंतर अॅनिमेशनमध्ये करिअर करण्याची संधी

बारावीनंतर अॅनिमेशनमध्ये करिअर करण्याची संधी

जंगलबुक, बाहुबली, सिंड्रेला, डोरेमॉन, मोटू-पतलू असे अनेक अॅनिमेटेड चित्रपट आणि प्रोग्राम आपण सगळेच पाहत असतो. त्यामध्ये लहानगेच नाही तर थोरामोठ्यांना पण पाहण्यामध्ये उत्सुकता असते. यशवंतराव चव्हाण प्रतिष्ठान, माहिती प्रबोधिनी मध्ये यांचे विद्यार्थ्यांना प्रशिक्षण दिले जाते. सी-डॅक तर्फे चालविण्यात येणारा डिप्लोमा इन अॅडव्हान्स कम्प्युटर आर्टस् (DACA) या कोर्सचा कालावधी सहा महिने पूर्ण वेळ आहे. या कोर्सची पात्रता कोणताही शाखेतून बारावी असणे तसेच टिचर कोर्स, आर्ट टिचर कोर्स, M.F.A, B.F.A, B.Arch., G.D. Arts, त्याचबरोबर कोणत्याही डिग्री किंवा Diploma in Advertisement, Commercial Arts etc. अशी आहे.

या कोर्स मध्ये Image Editing & effects, Print Media, Animation 2D & 3D, 3D Architecture, Cartoon Animation, Digital Audio & Video, 3D Modeling, Web Designing & Web Development  या विषयांचा अभ्यासक्रमात सहभाग आहे. त्याचबरोबर उत्कृष्ट संभाषण कलेसाठी Business Communication चे वर्ग घेतले जातात.

कंपन्यांनमध्ये विद्यार्थ्यांनी केलेले काम पाठवून व त्यांच्या मुलाखती करवून विद्यार्थ्यांना नोकरी संपादन करण्यासाठी यशवंतराव चव्हाण प्रतिष्ठान माहिती आणि तंत्रज्ञान प्रबोधिनी कडून मदत केली जाते. या कोर्ससाठी पूर्व परीक्षा पास होणे आवश्यक आहे.

डिप्लोमा इन अॅडव्हान्स कम्पप्युटर आर्ट् (DACA) या कोर्सच्या प्लेसमेंटसाठी Bombay Studio, Intel Gain Technologies Pvt. Ltd., Praxis interactive Services, Western Outdoor Interactive, Neosoft Technologies, Hindustan Pencils, Wisdmlabs, Multiversity etc. या कंपन्यांनी स्वारस्य दर्शवले.

'विज्ञानगंगा'चे सोळावे पुष्प संपन्न...

'विज्ञानगंगा'चे सोळावे पुष्प संपन्न...

यशवंतराव चव्हाण प्रतिष्ठान, मुबई व मराठी विज्ञान परिषद यांच्या संयुक्त विद्यमाने 'विज्ञानगंगा' कार्यक्रमांतर्गत सोळावे पुष्प, इस्टिट्यूट ऑफ केमिकल टेक्नॉलॉजीचे प्राध्यापक डॉ. सुधीर पानसे यांनी 'आधुनिक भारताची विज्ञान क्षेत्रातील प्रगती' या विषयावर नूकतेच चव्हाण सेंटरमध्ये आधुनिक भारताच्या विज्ञान क्षेत्रातील प्रगतीमध्ये मेघनाद साहा, दामोदर कोसंबी, शांतीस्वरूप भटनागर, होमी भाभा यांचे मोलाचे योगदान कसे होते ते स्पष्ट केले.
सुरूवातीच्या काळात इंग्रज विज्ञान क्षेत्रात प्रबळ आपल्यामुळेच आपल्यावर राज्य करतात, हे कलकत्ता वासियांच्या लक्षात आले, आणि त्यांनी त्या दृष्टीने पावले टाकण्यास सुरूवात केली. त्यानंतर भारतामध्ये संशोधनाच्या हेतूने कलकत्ता, लाहोर आणि अलाहबाद अशी तीन विद्यापीठ सुरू करण्यात आली अशी माहिती पानसे यांनी सांगितली. त्यानंतर मेघनाद साहा, दामोदर कोसंबी, शांतीस्वरूप भटनागर, होमी भाभा यांची शिक्षणं परदेशात कशा पध्दतीनं झाली. तसेच विविध शास्त्रज्ञांनी कशा पध्दतीने प्रगतीमध्ये हातभार लावला. पहिले महायुध्द, दुसरे महायुध्द आणि विज्ञान अशा ब-याच गोष्टी सांगून उपस्थितांना खूश केले.
होमी भाभा यांनी घरच्यांच्या आग्रहाखातर परदेशात अभियांत्रिकीचे शिक्षण घेतले, त्यानंतर त्यांनी भैतिकशास्त्राचा अभ्यास पुर्ण केला. काही महिन्यांच्या सुट्टीसाठी ते भारतात आले असता, परत निघणार त्याचवेळेस दुस-या महायुध्दाला सुरूवात झाली. आणि ते भारतात अडकले, दुस-या महायुध्द सहा वर्ष चालले आणि ते येथील संशोधनात पुर्णपणे गुंतून गेले त्याचा खूप मोठा फायदा आपल्या देशाला झाला. हे उदाहरण त्यांनी आवर्जून सांगितले. 

‘चित्रपट चावडी’ तर्फे 'टू डेज वन नाईट'

‘चित्रपट चावडी’ तर्फे 'टू डेज वन नाईट'

नाशिक : यशवंतराव चव्हाण प्रतिष्ठान मुंबई, विभागीय केंद्र नाशिक व विश्वास को-ऑप.बँक लि., नाशिक, विश्वास ज्ञानप्रबोधिनी अ‍ॅण्ड रिसर्च इन्स्टिट्यूट, नाशिक, सारस्वत बँक व रेडिओ विश्वास ९०.८ कम्युनिटी रेडिओ यांच्या संयुक्त विद्यमाने ‘चित्रपट चावडी’ उपक्रमांतर्गत शुक्रवार १६ जून २०१७ रोजी सायंकाळी ६.३० वाजता सुप्रसिद्ध बेल्जियम दिग्दर्शक जॉ पिएरे आणि ल्युक दार्दान यांचा ‘टू डेज वन नाईट'हा चित्रपट दाखविण्यात येणार आहे. सदर चित्रपट डिझास्टर मॅनेजमेंट अ‍ॅण्ड ट्रेनिंग हब (विश्वास लॉन्स), ठाकूर रेसिडेन्सी, विश्वास को-ऑप.बँकेसमोर, सावरकरनगर, गंगापूर रोड, नाशिक-४२२०१३ येथे दाखविण्यात येणार आहे.

‘टू डेज वन नाईट' मध्ये बेल्जीयम मधील एका शहरात सँन्ड्रा एका कारखान्यात व्यवस्थापनाने विभागातील एका कर्मचा-याला कामावरून कमी करण्याचा निर्णय घेतला. त्या बदल्यात इतरांना काही बोनस देण्याचेही ठरविले. योगायोगाने सँड्रावर त्या निर्णयात नोकरी जाण्याची वेळ येते. तिच्याकडे आता फक्त दोन दिवस एक रात्र आहे. सँन्ड्रा त्या काळात आपली नोकरी टिकवण्यासाठी काय करते ते पाहण्यासाठी अवश्य या. दार्दान बंधु जनसामान्यांच्या अपरीहार्य घटनांवर आधारीत चित्रपट बनवितात व त्यातील पेच प्रसंग ते मार्मिकपणे खुलवितात. २०१४ मध्ये प्रदर्शित झालेल्या या सिनेमाचा कालावधी ९५ मिनिटांचा आहेच. 

‘टू डेज वन नाईट' हा चित्रपट बघण्यास जास्तीत जास्त संख्येने सहभागी होण्याचे आवाहन कार्याध्यक्ष विश्वास ठाकूर, सचिव डॉ. कैलास कमोद, कोषाध्यक्ष डॉ. सुधीर संकलेचा, सदस्य सौ. कविता कर्डक, राजवर्धन कदमबांडे, रऊफ पटेल, नितीन ठाकरे व विक्रम मोरे यांनी केले आहे

'डिजीटल क्लासरूम'चे मा. श्री. शरद पवारांच्या हस्ते उद्धाटन

'डिजीटल क्लासरूम'चे मा. श्री. शरद पवारांच्या हस्ते उद्धाटन

स्व. मा. यशवंतरावजी चव्हाणसाहेब आधुनिक महाराष्ट्राचे निर्माते व धुरंधर राष्ट्रीय नेते यांच्या नावे प्रत्येक वर्षी यशवंतराव चव्हाण प्रतिष्ठान, मुंबईतर्फे राष्ट्रीय पुरस्कार देण्यात येतो. २०१५ साली मा. डॉ. विजय केळकर यांना पुरस्कार प्रदान करण्यात आला होता. केळकर यांना मिळालेल्या पुरस्काराच्या रकमेतून टिळक हायस्कूल कराड येथे डिजीटल क्लासरूम तयार करण्यात आल्या आहेत. त्याचा उद्धाटन समारंभ मंगळवारी २० जून रोजी सकाळी ११.३० वाजता मा. श्री. शरद पवार, अध्यक्ष, यशवंतराव चव्हाण प्रतिष्ठान, मुंबई यांच्या हस्ते स्व. यशवंतराव स्मृतिसदन (टाऊन हॉल) कराड येथे आयोजित करण्यात आलेला आहे. 

'बाल चित्रपट चावडी' उत्साहात सुरू

'बाल चित्रपट चावडी' उत्साहात सुरू 

अंबाजोगाई : यशवंतराव चव्हाण प्रतिष्ठान मुंबई, विभागीय केंद्र अंबाजोगाई यांच्या संयुक्त विद्यमाने शालेय विद्यार्थ्यांसाठी 'बाल चित्रपट चावडी' या कार्यक्रमाचे आयोजन करण्यात आले आहे. आजचा कार्यक्रमाचा तिसरा दिवस असून ५.३० वाजता जल परी चित्रपट दाखवण्यात येणार आहे. तसेच उद्या ४ जूनला ५.३० वाजता ब्रेक टाईम हा चित्रपट डॉ. काळेज् करिअर अकॅडमी, जाजू बिल्डींग, बाहेती हॉस्पिटल शेजारी, सायगाव नाका, पोखरी रोड, अंबाजोगाई येथे दाखविण्यात येणार आहे. १ जून आणि २ जूनला दाखवण्यात आलेल्या चित्रपटांना अधिक संख्येने मुलांची उपस्थिती होती.